સ્વામી વિવેકાનંદજીએ કહ્યું : ‘‘ગુલામોએ હવે માલિક બનવું પડશે. આવતાં પચાસ વર્ષ અન્ય ક્ષુલ્લક-દેવદેવીઓને ભૂલી, કેવળ ભારતમાતાની ઉપાસના કરીએ. આ એક જ દેવ જાગ્રત છે. ચારેય તરફ તેની ભુજાઓ, કર્ણો, ચરણો વ્યાપ્ત છે. આપણો આ વિરાટ સમાજ... તેના મનુષ્યો - પશુઓ સુધ્ધાં આપણા આરાધ્યદેવ છે. એ વિરાટ રૂપ પરમાત્માને ભૂલી, આપણે કયા અન્ય દેવની ઉપાસના કરીશું?!’’
સાનંદાશ્ર્ચર્ય એ વાતનું છે કે, 14 ફેબ્રુઆરી, 1897ના આ આર્ષદ્ષ્ટિયુક્ત ઉદ્બોધનના પ્રારંભમાં સ્વામી વિવેકાનંદજીએ ‘‘આવતાં પચાસ વર્ષ’’ શબ્દપ્રયોગ કર્યો હતો અને ત્યારબાદ બરાબર પચાસ વર્ષ પછી - 1947માં ભારતવર્ષને સ્વતંત્રતા પ્રાપ્ત થઈ. આ વર્ષે 12 જાન્યુઆરી, 2015 એ સ્વામી વિવેકાનંદજીની 153મી જન્મજયંતી છે. વળી આ વખતે એ જ દિવસે - સોમવારે પોષ વદ સાતમ પણ છે, જે ભારતીય પંચાંગ પ્રમાણે પણ સ્વામી વિવેકાનંદજીનો જન્મદિવસ છે. આવાં વર્ષો પછી આવતા બેવડા યોગના શુભ અવસરે આપણે સ્વામી વિવેકાનંદજીના સર્વસમર્પિત થવાના આહ્વાનને; હૃદયમાં નિષ્ઠાપૂર્વક ધારણ કરી, તેને કૃતિમાં ચરિતાર્થ કરીને જ; સાચા અને પૂરા અર્થમાં ‘‘વિવેકાનંદ જયંતી’’ સાર્થક રીતે ઊજવી શકીશું...!
No comments:
Post a Comment